Jini të mëshirshëm! Efesianët 4:32

Kur mendoj se Perëndia e bëri drejtësinë duke e dënuar mëkatin tonë në trupin e Krishtit dhe na dha ne mëshirën e Tij mahnitem, bekohem, mbushem me lavdërim dhe mirënjohje të madhe për Atin. Me anë të Krishtit Perëndia nuk na dha atë që meritojmë, pra dënimin e përjetshëm për shkak të mëkatit, por faljen me anë të besimit në Jezusin. Sa e çmuar është kjo e vërtetë!

Jini të mëshirshëm! Efesianët 4:32 Por jini të mirë dhe të mëshirshëm njëri me tjetrin, duke e falur njëri-tjetrin, sikurse edhe Perëndia ju ka falur në Krishtin.

Në Fjalën e Zotit bijtë e Perëndisë dhe mbi të gjitha Zoti ynë Jezusi, shfaqen mes të tjerash të mëshirshëm. Të kesh mëshirë d.m.th të mos i japësh tjetrit atë që i takon, në këtë rast Zoti nuk ka na dhënë ndëshkimin për mëkatet tona por na ka falur në Krishtin, sa e çmuar kjo gjë.
Dashuria, hiri, përkujdesja, mëshira, paqja, drejtësia dhe nderimi shkojnë bashkë në jetën e Krishterë.

Nëse tregojmë mëshirë për të tjerët ne presim që Perëndia të tregojë mëshirë edhe për ne, këtë jo se e fitojmë nga mëshira jonë, por se në dashurinë e Tij Zoti ynë na jep mëshirë prej fronit të Hirit dhe Mëshirës.
Mëshira dhe gjykimi vijnë të dyja nga Perëndia, aty ku Ai gjen një zemër të përulur, të penduar derdh mëshirë, aty ku nuk ka pendesë por mosbindje ndaj Tij, Ai shfaq drejtësinë e Tij të shenjtë në gjykim.
Është e mrekullueshme dhe tepër përulëse kjo e vërtetë kur e njoh se mëshira e Tij përtërihet çdo mëngjes për të më treguar se në çdo ditë të re kemi nevojë për të.

Megjithatë konfliktet, grindjet mes besimtarëve reflektojnë mungesë dashurie, mëshire dhe nderimi për njëri-tjetrin. Ato shfaqin një qëndrim që kërkon të gjykojë tjetrin, apo të bëjë drejtësi, e cila kur del nga një zemër me mëkat është me anësi dhe me shumë pasoja.
A nuk duhet që ne që jemi të bekuar nga mëshira e Zotit të jemi të mëshirshëm?

Kur kalojmë kohë me Fjalën e Zotit, kur lutemi, kur reflektojmë dhe kërkojmë që karakteri i Krishtit të formohet në mua, në ty, kur frymëzohemi nga shembujt e mëshirës në Bibël dhe në kishë, atëherë do t’i trajtojmë të tjerët me mëshirë, me hir, me dashuri dhe me falje, pikërisht ashtu si Zoti na ka treguar dhe na ka mësuar që të bëjmë.

Bota do të tërhiqet nga një dëshmi e tillë e jona, por aspak nuk do të tërhiqet nga fryma gjykuese. Perëndia i mëshirës do të lavdërohet në faljen, mëshirën, dashurinë dhe hirin tonë, pasi kështu reflektojmë se Ai banon dhe mbretëron në ne dhe se ne si bij dhe shërbëtorë të më Të Lartit po e zbatojmë Fjalën e Tij dhe po e nderojmë Atë.
Çfarë të kujton dhe sjell në zemër mëshira e Perëndisë për ty? Ndaj kujt duhet të jesh i mëshirshëm dhe e ke të vështirë në këtë kohë? Cilët janë për ty shembujt frymëzues të mëshirës? Lutem që ne të gjithë do të jemi të mëshirshëm si Ati ynë ndaj nesh.

Lutje
Perëndi i hirit dhe mëshirës, të falënderoj që je i tillë me mua, me ne dhe që na kërkon që të jemi të mëshirshëm. Zot na ndihmo që të tregojmë mëshirë për ata që është e vështirë. Mos lejo frymën e gjykimit dhe krenarisë të zërë vend në mua, te ne, por vazhdimisht formo karakterin tënd te ne, na mbush me Frymën e Shenjtë dhe na aftëso ta zbatojmë Fjalën tënde. Që të tjerët të ndërtohen dhe Ti të lavdërohesh. Në emrin e Krishtit, Amen!

Përgatiti Pëllumb Ranxha